Maubenaise

Ai pas 'gut léser de tornar venir sus queu blòg.
Aura, vene de passar un autre cap e un aniversari lo 14 de queu mes d'Aust , dos jorns passats a Peiriguers, ma vila de naissença.
Lo temps a passat e passa enquera... e d'un temps d'un còp era me ven n'a nostalgia que me laisse n'impression de maubenaise.
Trop de temps s'es debanat, me sente estrangier emb un morre d'estrangier dins los ranvers dau necitge d'autres còps.
E çai que de lai , Peiriguers es venguda 'na plan brave pita vila e totjorn emb la soa miraudiosa ciutat medievala e vestitges gallò-romans...nonmas l'aire per me far dau còr tifa-tafa.
Sent-Front, Sent Jorge d'autre costa d'Eila, coma dos barris, dos quartiers de la vila, e las doas tors, Vesona e Mataguerra.
Nostalgia de tot, d'autres còps, de la lenga esvanesida daus merchat, impression de chaminar tot au ras e a costat de quauquaren, impression d'esser vengut ren mas qu'un fora-bandit de torista.
Me demòran ren, nomas, nonmas lo non-ren de las sòbras, e la 'gremas d'Eila...Maubenaise.
Jamai pus deguna nostalgia ne podrai pus aimar, tot aquò me fai mau e me balha lo mau-ben-aise...Maubenaise.
Mas doman sira un brave d'autre jorn, e doman un grun d'esperar de mai en mai lo pitit quauquaren que fai surtir lo grelh de la tuta.