E veiqui 'na bona novela de veire Peiriguers e lo seu rugbi accedir a la prumiera pòrta de l'elita, 'quo es a dire a la Pro D2, ma vila de naissença que se'n va rejunher Pau ma vila de residéncia de l'ora d'aura es 'na novela que me rejauvis que jamai pus .
Òc de segur , aquò m'agrada plan de veire entau la mias doas vilas de" propedeutica occitana" se tornar trobar sus lo brave terrenc d'Ovalia, la terra de la veissiga, e ne sei tot chap-virat.
O cap-virat entà parlar dens un aute parlar.
A l'Oest d'Occitania e dau Nòrd de cap au Sud d'Aquitània, de l'Ennaut au Mieijorn/Mieidia d'una veissiga tota quilhada per un dròp, e de Capsus tà Capbaish, l'Òc de cultura lemosina e peiregòrda e l'Òc de cultura gascona e bearnesa coma l'aiga e lo fuòc, los "filh de loira" e los "hilhs de puta" e que 's van acampar e massar bra'ament dins una mesclada de las bravas e de las "beròias".
Plan segur, la Seccion de Pau (La Section Paloise) es mai titrada que los nòstre CAP de Peiriguers que ven de festejar dignament los seus 110 ans d'existéncia, mas qui zo sap ça que podra 'ribar 'questa remirabla annada que s'anoncia per nosautres.
Quo es un pauc coma se lo Ciranò (enquera que de Brageirac) 'nava crosar lo ferre de l'espada coma l'Aramis (enquera que...d'Aramitz), lo Fébus e los Born dins 'na guerra frairenala au torn d'una veissiga, e lo Montbazalhac contra lo Juranson, veires que s'entrebescharan per la tresesme terç temps.
www.sectionpaloise.com vs www.caprugby.fr
