Un fòrom per platussar ren mas qu'en lemosin: 'chabatz d'entrar.

Auei me sei dich que me podria  mainar de crear un pitit foròm per forrar e borrar e per platussar ren mas qu'en lemosin
Me fau pas tròp d'illusions, òc-de-segur , mas me pense que vau la pena d'ensajar, istòria de n'aprener mai subre lu Lemosin, la linga a la nòstra mòda, avem jamai 'chabat d'aprener de prener e de balhar.
Un foròm es un mejan de mai.

Aqueste forum l'ai 'pelat "'Chabatz d'Entrar" , quò me semblava 'cepte, logic, simple, per un endrech ente lu monde van platussar ed eschamhar/eschamjar en lemosin.

Mas lu fdldfdg* de ròbot que m'a nonmas conservat que lu "chabatz" dau "chabatz d'entrar"  qu'avia picat per entrar l'adressa (filh de loira de filh de garça* , fan tot per embestiar lu monde!).



       http://chabatz.forum-actif.eu/forum.htm                

      chabatz? mas chabatz que? chabatz d'entrar filhde loira!


E, per los que desiran platussar per delai los limites daus brave Lemosin  e far causa comuna emb tot lu brave monde de los que platussan, charran, que parliquejan, que discutejan, que lengarejan... e que te sabe mai , en occitan, i a tanben lu fòrum de tots los occitans: lemosins, auvernats e aupencs, gascons, lengadocians, provençaus... rapelarai queu site qu'es plan 'cepte:

                                                   http://occitania.forumactif.com/

Tivier per ne platussar

Tivier per ne platusssar, Tivier per ne chantar, Tivier per ne far de pantais rojadós, Tivier p'ita vila de mon enfancia, coma podria oblidar tos ranvers.

Tivier, Tivier, l'endrech mainadier
Tivier, Tivier, entre Eila e Còla
Tivier, Tivier, terra d'enfancia
Tivier, Tivier, país sancier

Tivier, Tivier, los prats bien granats
Veiquí la terra daus goiats
Brava terra peiregòrda
Tot a rasís dau Lemosin

A Tivier sem 'ribats
Dins la prada bien pausats
Sus los termes verdejants
Los cocaus  son minjats

Tivier en Peirigòrd!
Tivier dau Lemosin?
Tivier dau Lemosin!
Tivier en Peirigòrd?
Te'n fajas pas
'Quò fai pas ren
Tivier la brava
D'Embdos fai frójar
Daus ranvers lu mielher

Los meus autres blògs: PSICOTRABENOC, platussadas, ...

Mas zo sabetz, òm pòt pas tot dire en occitan, "on ne peut pas tout dire en occitan", what so on!!!???...

De qué?
 Filh de loira de filh de garça, mas se pòt parlar de tot e de ren dins tota linga que Diu e l'Òme an fach!

Veiquí 'na brava ocasion que m'a decidit de botar un cors de "Psicologia dau trabalh e de las organizacions", tot en occitan daus meus ranvers sus la brava malha, l'ai sonat "PSICOTRABENOC" ( http://psicotrabenoc.blogspot.com/ ), e, en passar , veiquí lu lijam dau blòg d'un autre blogaire (me pense provençau o niçarte) consacrat a la sciença e ren mas , nonmas dau fuec de Diu dins la nòstra linga d'ÒC!

Qu zo sap, benleu i aura una Universitat, un jorn prueimar, ente tot l'univers s'ensenhará dins la nòstra linga , i a ren a far si non que damandar l'impossible, emb lu Net avem dins la man la debuta d'un brave pitit quauquaren.

La sciença dins la lenga nòstra: http://scienca.canalblog.com/


E i a los blògs qu'ai chabat per oblidar que z'avia creat i a d un temps d'un còp era, "nonmas per platussar de quora en quora" :

                                     http://platussadas.nireblog.com/

Lu fiau de las videos de GDT (goiat d'a Tivier)

Quante serai mai saberut dins l'Art de botar de las videòs veiqui au mens la chadena qu'ai començat de crear subre lu site de partatge "Youtube":

 "Lemosin Peirigord"              http://www.youtube.com/user/LemosinPeiregord?feature=mhw4

I aura me pense quauquas videòs de musica dau folc-lòre lemosin e peirigòrd, de las videòs daus meus viatges en Peirigòrd Verd , Lemosin, dau Bearn ente demòre,  d'autras contradas dins los país de nòstra linga d'Òc e d'autres ranvers dins lu brave monde.

Quante aurai 'chaptat (crompat) una camerà que conven òc de segur.

Los blogs e los sites en linga nòstra qu'aime vesitar

De còps que i a , vau vesitar (o visitar) d'autres blògues , 'na brava ajuda per ió que sei ren mas qu'un amator a las debutas dins lu maine dau bloguitge.

D'en prumier vau vesitar los que son escrichs en occitan dau Lemosin e dau Peirigòrd, puei me vau en Aquitania juscanta Pireneus, legir, escotar e veire (quante i a de videòs) los que pòde legir aisidament en gascon (e sei bien oblijat estant que demòre a Pau en terra bearnesa e donca gascona) , en aragones o en catalan ed espanhòu, e, fin'finala, mai un pauc mai luenh dins lu maine occitan (aime bien per eisemple lu brave site de la Chambra d'Òc http://www.chambradoc.it/  , escrich en occitan de las Valadas occitanas d'Italia emai en franco-provençau o arpitan.

Dempuei que demòre dins la vila dau "Noste Enric" aime bien segre de temps en temps lu site d'un professor ed inspector de l'ensenhament en retirada escrich dins 'na saborosa linga bearnesa (gascona), e en mai d'aquò lu quite site es plan instructiu e organizat qualitadosement (aimariá plan ne legir un entau en lemosin):

Flors de Bearn   http://www.bearnbearn.com/

                              _______________________________________

Per lu Lemosin e lu Peirigòrd i un brave malhum e subre tots los subjects, politica, còps de gulas , informacion localas e musica...


Blogar en oc en Peirigòrd    dins l'emmòtle lemosin

Dins mos ranvers, tot a rasís de Tivier e de Sent Saud o Sensaut, dins lu país verdejant de Brantòsma i a los blòg dau Doctor Jan Ganhaire, escrivan occitan  (a escrich de remirables libretons de ficcion dins las colleccion de libres en occitans "A Tots"coma "Lo Libre dau Reir-Lutz" o enquera "Lo darrier daus Lobaterras" auei es un òme politic locau  conselher regionau e fòça d'autras chausas enquera:

Joan Ganhaire (Jean Ganyaire): http://www.nama24.com/jeanganyaire/

Mai joùne per entrar dins la carriera i a maitot Marçau Peironin (Martial Peyrouny) que ten 'na cronica dins lu quotidian regionau "Sud-Ouest", professor d'occitan ed escrivan:

http://dictonsoc.blogspot.com/      e       http://peyrouny.blogspot.com/  e enquera

                                 http://oc-en-stock.blogspot.com/ dau mesma (en frances)

                                      o dins l'emmòtle sarlades (lengadocian)

E blogar enquera dins la sòbras de tot lu Lemosin , ne i a , ne i a:


En Aquitania


En Occitania

I a un forum desjà plan conegut:  http://occitania.forumactif.com/

E recentament 'na brava iniciativa niçarta (o nissarta) per los qu'aiman platussar o charrar dins tot l'espandis de la linga nòstra:

                                    http://charrada.ning.com/

Per la blogòsfera occitana per los que volen far n'esfòrç  de cerchar daus blògs e de bògar, a i a lu Bloguitge e apres ia ren mas qu'a picar sus lu clavier:

Prima flor de Sent Saud e fiau de chantadissas

Chada prima (printemps) i a una votz 'na votz brava e p'ita que me ven de Sensaut e la Cossiera e me chanturleja un refranh ente la flors butan.

Buta la flor, buta la flor
Buta la flor de Sensaut
Veiqui la prima, veiqui la prima
La prima flor de Sensaut

Punta lu jorn emai la flor
Tot a rasís de l'androna*
Ente ió m'agrumelissia
La flor mai brava butava
A la broa de la Drona
Tota la flora, tota flor
Puntava per l'avenidor.

La flor "monta e poïa" coma ditz lu  trobador a l"Entrada dau Temps Clar".
 'Chabat lu temps de s'acialar, e 'chabat lu de frejurar, 'chabat lu temps daus morres longs, dreibissem (dubrissem)  lu temps de festejar e de chantar, quante la vita punta prumiera coma buta la flor.
Sens ren butir au lendoman totas las fenestras s'alandan per viure e s'alegrar.

Chabatz d'intrar, e tu brava prima prim-prima de primtemps, balha nos lu ciau de Sensaut, lu solelh de Cossiera e l'aiga de Drona, la "montanha" dau Pic e la terra de  Vilòta, la lind'aiga dau Lac Grand e la benveguda per tot los viatjaires.

Androna*=via=rota

Où l'ome, desvelha te! prumiera tieira

Me desvelhe tot suau tot suau de l'ibernacion.

Filh de loira , 'quò fai un temps d'un còp era qu'ai pas platussat subre 'queste brave pitit blòg en lemosin, tres braves mes, e me pense que, 'queste filh de garça d'ivern bearnes tan coma peiregòrd, ente fasia freg que jamai pus, emb-de las temperaturas en dejós de 0°, fuguet per quauquaren dins 'na brava ibernacion.

La pensadissa e l'enveja d'escriure ne s'es trobada tota engordesida, tota empesugada, e chaminava, plan-plan, coma lu paubre gigant Gergant dins la fanhas dau Lemosin d'autres còps!

Où , l'òme! me dise, desvelha-te un pauc! leva-te lu pe maleirós, emb-de la prima (lu printemps) e las flors que butan veiqui lu temps de las votacions (o eleccions ) e daus "tocha me la man" o  "tocas manetas" coma disen en Bearn e Gasconha , terme qu'a balhat en francitan (la forma locala dau frances parlada per lu monde daus ranvers qu'es a dire un boiradis/mesclatge/mescladissa de frances e d'occitan) "toque manettes". Los "toques manettes" ilhs maitot(=tanben) se desvelhan per chaçar l'elector.

E d'efiech, en 'questa brava annada que s'acomença avem 'gut la colera de Xynthia, quina femnassassa quela d'aquí , 'via n'a curiosa faiçon de celebrar la jornada de la femna la domaisela ventosa, bufadoira ed aigosa quin aigatge; la filha de loira nos faguet petar las parets que ne'n fugueren totas desrochadas, las fenestras e los barratges (paubres vesins de las Charentas!), puei vengueren las discutidas petaçonieiras subre la burqas, los niqab, los burqinis e los petaçons de l'unas subre la testas, e las cagolas de l'ETA o dau FLNC e , sens oblidar lu nòstre brave Petaçon dau Carnaval de Peiriguers(1) e que te sabe mai, e l'identitat nacionala en mai d'aquò e tot los forra-borra ed un fatradis a te'n clafir lo cerveu sens cruveu per ne filtrar ren mas tot un aigatge d'informacions de vam e d'autre vam, e tot aquò, fin'finala ,  seguit per lu temps de las eleccions regionalas.Quin rambalh fuec de Diu!

Enfin , de las eleccions, ente los que volan balhar una visibilitat o, coma disen los lengadocians que parlan "blós", una "vistabilitat" politica, per la causa de la linga nòstra dins tots los partits que zo volen ben(2), començan de se manifestar, sabe pas se 'quò chamjará grand chausa, mas, coma fau 'na debuta a tot, perqué non, de drecha , de gaucha, dau centre e mai dins los estrèmes trobar de las gents femnas ,òmes qu'an servat un pauc de consideracion per la linga nòstra fai pas de mau.
La linga occitana pòt parlar de tot e de ren tan coma tota linga, linga de maison, liga d'ostau `c , mas vhau par cranher de butar un pauc la parets e d'alandar grandas la fenestras.

Quò es vertat que i a de que desvelhar un pauc lu brave monde e nos surtir fin'finala de l'ibernacion e de las frejuras de l'ivern.



(1) Lu Carnaval de Peiriguers (http://pagesperso-orange.fr/persona.grata/CARNAVALPERIGUEUX.html ) , mens conegut que lo  de Pau en Aquitania (http://www.carnavalbiarnes.com/ ),es  lu Carnaval de ma vila de naissença  que se 'chaba naturalament per la brutlason de l'òrre Petaçon tan coma la dau meschaent Sent Pençard a Pau.
(2)La linga dÒc a 'gut en Bearn ed en Peirigòrd los seus candidats subre la listats des quauques partits politics, e comença d'esser representada per quauques elegits coma l'escrivan e conselher regionau Joan Ganhaire (Jean Ganyaire) o l'editorialista e professor d'occitan , conselher municipau de Brantòsme, miraudiosa p'ita vila ente ai conservat un pauc de familha , Marçau Peironin (Martial Peirouny) o enquera lu filh dau professor de filosofia e lexicografe de l'occitan dau Bearn Miqueu Grosclaude, David Grosclaude per los partits socialista e ecologista daus "Verds".
Òc-de-segur ne i a, sens chap de  dobte, d'autres, dins d'autras formacions e me chaudrá desencusar de z'aver obludats, mas quilhs an permetut de mediatisar un pauc mai de la linga nòstra (lemosina, gascona , bearnesa) dins la campanha regionala en Aquitania (en Lemosin, autre region vesina d'ente me sente tot a rasís per l'eime , la linga e la geografia zo sabe pas).

Où l'Òme desvelha te, quo es un pauc ad ió-mesma que parle,sei totjorn a durmir coma 'na loira, un grelh o-d- un teisson-chen dins la tuta.

La linga se convida dins la cmapanha electorala en Aquitania e en Peirigòrd.
Lijams

Sites/Blogues de Joan Ganhaire e de Marçau Peironin (Jean Ganyaire et Martial Peyrouny) :
http://www.nama24.com/jeanganyaire/  medecin, òme politique ed escrivan peirigòrd

http://peyrouny.blogspot.com/        professor d'occitan, jornalista editorialista (SudOuest) , òme politique ed escrivan.  

Joan Ganhaire e Marçau Peironin son tots dos sòcis dau Partit Socialista (tan com Paco Boya entarà val d'Aran: http://pacoboya.blogspot.com/ ), David Grosclaude, lu bearnes, que coneisse un pauc, un jornalista, editor de libres d'ensenhament de la linga per los mainatges, es subre la lista d'Euròpa Ecologia, dins la region Aquitania sabe pas se ne i a dins d'autras formacion (lu Modem de Vayron, pareis que s'escriu coma aquò en bearnés, ad un president que parla occitan dau Bearn ed un autre, Jan Lassala/Lassalle que butava autres còps  la chançon "Aqueras Montanhas" a l'Amassada Nacionala mas n'ai pas vist de monde que se declaravan actius ad aparar l'avenidor de la linga nòstra subre la listas Modem, ni de l'UMP ni de l'estrèma gaucha o de l'estrèma drecha).
Quo es pas un jutjament de valor, nonmas un constat.